PANIMDIM. SA. PANAGIMPAN: Unang Pahimakas

 PANIMDIM  SA PANAGIMPAN: Unang Pahimakas

Bumanaag ang umaga, narinig mo

     [Gumising ako’t namulat katabi mo]

Awit ng pahimakas, bumabati

[Kasiping ka, tulad nang dati]

Pagka’t hinihintay pa natin ang kaganapan…..

[Kapiling ka sa magdamag]

Pagsilang ng araw, pupunitin ang dilim

[Nadama’t nasalat kita pagkagising]

Panaginip ay magbubukang-liwayway

[Lumundag ang puso’t natagpuan ka]

Sa hudyat ng awit, pumintig— pumiglas!

[Kapiling ka muli, aking pakiramdam]

Itatambuli ang tagumpany ng pag.ibig—

Ipinaghiwalay tayo, sinibak ang tipan

[Bagamat malamig ang gabi, nagliliyab ang tiwala]

Nagliwanag ang dilim, pagbangon

[Hinipo mo ako, niyakap, inalo]

Palalayain ang kaluluwa sa matris ng silangan

[Sumigla ang diwa ko sa iyong kalinga]

Sinilab ng ilanlibong sulo ang pusong naglalamay

[Kahit walang saksi sa nagaganap]

Ngunit sa ilaw ng ating paningin, sa sinag

ng ating maalab na paghandog ng buhay

Tanaw ang tagumpay ng iyong pagmamahal,

Halimuyak ng mutyang pinakasasabikan….. 

—E. San Juan, Jr.