Friday, June 01, 2007

BAKIT PALAGING LUMULUHA ANG MASA?



___________________________________________

BUMABAHANG LUHA ANG SHABU NG MADLA

(Para kay Susan Fernandez, pasintabi sa mga kantor ng AEGIS)





Upang isulong ang pakikibaka, kailangan ang nalalabing lakas
Na di dapat sayangin sa walang habas na pagtili sa pantasyang masarap--
Anong kinabukasan ng mahal mo’t ng bayan kung lagi na lamang nangangarap?


Nananaginip nang gising

Buhat pa ba n’ong si Magellan, o si Dewey sa Manila Bay hanggang Balikata’y nalasing?

Nakatulala sa hangin

Ay naku, Inday, malala pala’ng sakit mo, higit pa kay Nicole, baka di ka na gumaling…

Nagsusumidhing damdamin

Binola ka ng Kano, aray ko, natuliro sa Olongapo’t nagkandarapa hanggang piyer

Kahit halik lang ang akin

Talaga palang sobra, sagad-buto na tayong dinaya’t sinuhulan sa pagtitimpi’t pagsisisi

Nababaliw ako sa iyo

Siyanga? Hanggang dito na lang ba tayo—nagtiis sa diktadurang Marcos at ngayo’y kay Arroyo?

Bawat silakbo ng puso ko

Binili kang “mail-order bride,” OCW, tinubos ng pulang mandirigmang nagsakripisyong lubos

Sa isang sulok na lang umiibig sa iyo, Sinta


Dinuhagi’t nasalanta, walang pag-ibig kung ikaw’y gutom binubugbog ginagahasa
Bakit luha mo’y ibinubuhos sa sulok walang hiyang ibinubulyaw ang pagkaulol?
Gumising ka’t sunggaban ang gulong ng buhay igayak ang puso sa pakikibaka

“Ipaglaban hanggang kamatayan?” Sinta, ipaglaban ang kalayaa’t minimithing kasarinlan.

No comments: