PARANGAL KAY MAITA GOMEZ, BABAENG MANDIRIGMA

“No uprising fails… Each one is a step in the right direction.” –Salud Algabre

Anong kapangahasan Apoy ng kababaihan

Biruing ibulalas: “Walang sayang, hoy!

Bawat siklab ng pagbabalikwas ay pagsulong

sa wastong direksyon—”

Mula Cabiao, Nueva Ecija hanggang Sta. Rosa, Laguna, nauna na si Salud Algabre---

sumunod si Maria Lorena Barros, Cherith Dayrit, at ngayon si Ka Maita—

Ilang titis lamang, sumiklab ang rumaragasang sunog

lampas na sa hanggahang naigpawan, di nasayang

Anong kapangahasang lumagablab

tumutupok sa bawat sagwil ng pulis at militar ng diktadurya’t imperyo

Mapangahas na nagliliyab ang parang dagat lunsod

mula Bontoc hanggang Tawi-tawi, di nasayang

Sa pinagkiskis na buto’t laman ng ilanlibong inang nagdiringas dumadarang

Apoy ni Maita Gomez, armadong paraluman—

Alab ng ilanlibong babaing naghihimagsik

Gumigising sa mga nabuwal sa dilim ng pagkaduhagi’t pagkaamis

Bumabangon mula sa gabi ng pagkaalipin at pagdadalamhati

Binubulabog ang luksang bilanggo’t kuta ng mga salaring nasayang

Nagpupumiglas upang matamo ang luwalhati’t sayang pinapaginipan

“Walang sayang—”

Sa bawat kiskis

tumitilampon ang titis,

nagliliyab ang parang, salamat sa iyo, pinakasasabikan,

pinakamimithi—

---E. SAN JUAN, Jr.